Rusiye Tış işler naziri Sergey Lavrov Pervıy kanal intervyüsına bildirgenine köre, özek cenk telükeleri şimdi pek büyük ve bu telükege doğru qıymet kesilmeli.
Onıñ aytqanına köre, Moskva özek cenk olmasını istemey.
«Bu bizim printsipial fikrimizdir. Oña esaslanamız. Şimdi, ürmetli siyasetşınaslarğa esaslanıp, aytqanıñız kibi, telükeler pek yüksek olğanda, bu telükeler suniy bir şekilde qabartıla, bunı istegenler az degildir. Telüke ciddiydir, kerçek, oña doğru qıymet kesilmeli», – dedi Lavrov.
İntervyü Ukrainadaki cenkke bağışlandı (Rusiye akimiyeti onı mahsus operatsiya dep adlandıra). Rusiye Tış işler naziri Ğarp memleketleri Ukrainağa silâ berip, Rusiyege qarşı «proksi-cenk» keçire, dep ayttı.
Ukraina prezidenti Volodımır Zelenskıy CNN Amerika kanalına bergen intervyüsında dünya Rusiye özek silâsını qullanacağına azır olmalı, dep ayttı.
ABD Merkeziy istihbarat idaresiniñ müdiri Uilyam Berns Rusiyeniñ Ukrainada taktik özek silâsını ya da o qadar quvetli olmağan özek silâsını qullanuv telükesine tüşüncesiz yanaşmağa olmay, çünki bu cenkte ğalip çıqamasa, prezident Putin müşkül alda ola bile».
Lâkin Merkeziy istihbarat idaresiniñ Kremlniñ özek silâsını yüksek cenk azırlığı aqqında «ritorik beyanatına» baqmadan, Moskvanıñ böyle adım atacağına dair delili yoqtır, dep qayd etti Berns, aprelniñ 14-nde Georgia ştatınıñ Tehnologik institutında.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3f6698iwwkivl.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
