Ukrayina akimiyeti haber etkenine köre, Qara deñizde rus uçucısız uçaqlarınıñ sivil gemilerge ücüm etüvi neticesinde Panama bayrağı altında olğan geminiñ ekipaj azası elâk oldı, daa beşi yaralandı, dep bildirdi Ukrayinanı ğayrıdan tiklev baş nazir muavini Oleksiy Kuleba.
"Qara deñizde rus dronlarnıñ sivil gemilerge ücüm etüvi neticesinde Panama bayrağı altında olğan geminiñ ekipaj azası elâk oldı, daa eki deñizci yaralandı, olardan biri ağır yaralandı... Bundan ğayrı, Sent-Kits ve Nevis bayrağı altında olğan geminiñ ekipaj azası yaralandı", — dep yazdı Kuleba telegramda.
Onıñ qayd etkenine köre, Rusiye "deñizcilik serbestligi, halqara ticaret ve global aşayt havfsızlığına qarşı cenk alıp bara" ve bu kibi cinayetlerge "terrorizm" kibi halqara qıymet kesilmeli.
Rusiye arbiyleri Ukrayina regionlarına muntazam sürette ücüm ete, çeşit silâ qullana – uçucısız, raketa, KAB, reaktik toplu atış sistemaları.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tasnif ete ve olarnıñ maqsadı bar, dep qayd ete.
İnsanlarnı elektrik energiyası, sıcaq, su, bağ, tibbiy yardım ve yaşayış içün diger kerekli şaraitlersiz qaldırmaq içün eali yaşayışını teminlev sistemaları ve sağlıq müessiselerine qarşı ateşler genotsid areketleriniñ alâmetlerini taşıy.
Rusiye reberligi Rusiye ordusı büyük cenk vaqtında Ukrayinanıñ şeer ve köylerinde vatandaş infrastrukturasına qarşı darbe endirgenini, vatandaşlarnı öldürgenini ve hastahane, mektep, bala bağçaları, energetika ve suv obyektlerini yıqqanını inkâr ete.