Oktâbrniñ 21-ne keçken gecesi Rusiye arbiyleri Harkivge ücüm etti, 12 insan yaralandı, dep bildire yerli akimiyet.
İlk malümatlarğa köre, Harkivge dört idare etilgen ava bombası ve "Grom-E1" gibrid raketa-bombası ile darbe endirildi, dep bildirdi Harkiv vilâyetiniñ prokuraturası.
Vilâyet prokuraturasınıñ matbuat kâtibi Dmıtro Çubenko "Suspilne" neşrine bildirdi ki, "Grom-E1" gibrid raketa-bombalarınıñ qullanıluvı, 12 biñ metr yükseklikten, maqsadından 100 km uzaqlıqtan atılğanını köstere.
Prokuratura vekiliniñ aytqanına köre, yaralanğanlarda camnen kesilgen yaralar, qapalı qırıqlar ve qafa-miy yaraları qayd etilgen. Harkiv şeer yolbaşçısı İgor Terehov, 12 evniñ zarar körgenini bildirdi. Olardan ekisi bütünley yoq etilgen, dey prokuratura. Bombalardan biri çoq qatlı mesken evlerniñ yanında patladı, camlar qırıldı ve divarlar zararlandı.
Rusiye arbiyleri çeşit silâlardan muntazam sürette ukrayin regionlarına ücüm ete.
Rusiye yolbaşçılığı, Rusiye ordusınıñ, büyük cenk vaqtında, Ukrayina şeerleri ve köyleriniñ grajdan infrastrukturalarına maqsatlı darbeler endirgenini, vatandaş ealisini öldürgenini ve hastahaneler, mektepler, bala bağçaları, energetika ve suv teminatı obyektlerini yoq etkenini red ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
