Rusiye ordusı Ukrayinağa 84 "Şahed", "Gerber" ve diger çeşitlerniñ ücüm uçaqlarınen ücüm etti, dep bildire Ava quvetleri ilk yaz ayınıñ 9-nda.
Atışlar Brânsk, Kursk, Millerovo ve Primorsk-Ahtarsk şeerlerinden yapıldı, olardan 50-den ziyadesi "Şahed"ler, dep qoşa komandanlıq.
Ava ücümini aviatsiya, zenit raketa orduları, REB ve pilotsız sistemalar bölükleri ve Mudafaa quvetleriniñ mobil ateş gruppaları qaytardı.
"İlk malümatqa köre, saat 08:30-ta ava mudafaası tarafından memleketniñ şimalinde, cenübinde ve şarqında duşmannıñ "Şahed", "Gerber" ve diger tiplerniñ 60 pilotsız uçağı uruldı", — dep aytıla haberde.
Arbiyler 23 ücüm uçağınıñ 10 yerge urulğanını qayd etti.
Rusiye arbiyleri Ukrayina regionlarına çeşit silâlardan muntazam sürette ücüm ete.
Rusiye yolbaşçılığı, Rusiye ordusınıñ büyük cenk vaqtında Ukrayina şeerleri ve köyleriniñ grajdan infraterkibine maqsatlı darbeler endirgenini, vatandaş ealisini öldürgenini ve hastahaneler, mektepler, bala bağçaları, energetika ve suv teminatı obyektlerini yoq etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıy ve olarnıñ maqsatlı olğanını qayd ete.