İşğal etilgen Qırımda noyabrniñ 27-ne qadar Rusiye Federatsiyasınıñ ordusını «itibardan tüşürüv» sebebinden 1093 dava açıldı, dep haber ete Ukrayina prezidentiniñ Qırım Muhtar Cumhuriyetindeki daimiy vekili.
Qayd etilgenine köre, 955 adisede para cezası şeklinde memuriy cezanıñ berilüvine dair qarar çıqarıldı.
«Tirenüv quvetleşkenini Qırımnıñ işğalci mahkemelerinde Rusiye Federatsiyasınıñ Silâlı Quvetlerini itibardan tüşürüv maddesine istinaden yañı qanunsız memuriy davalar köstere. 2024 senesi noyabrniñ 27-ne qadar malümat kelgen 1093 vaqia qayd etildi», – dep aytıla haberde.
Rusiye Federatsiyası büyük istilâğa başlağan soñ Rusiye ordusınıñ «diskreditatsiyası» aqqında Memuriy cinayetler kodeksiniñ 20.3.3 maddesi kirsetildi. Rusiye-Ukrayına cenki aqqında malümat tarqatqanlar ve Kremlniñ noqta-i nazarına zıt kelgen er angi fikir bildirgenler taqip etile.
Oktâbr ayında berilgen malümatqa köre, 2022 senesinden başlap Rusiye mahkemeleri Rusiye ordusını «itibardan tüşürüv» ve arbiy «yalan haber» davaları boyunca umumen 240 mln rubleden ziyade para cezaları berildi.
Ukrayina prezidentiniñ Qırım Muhtar Cumhuriyetindeki temsilciliginiñ malümatına köre, işğal etilgen Qırım sakinleri Rusiye ordusını «itibardan tüşürgeni» içün 26,4 mln ruble memuriy para cezalarını töledi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
