Dekabrniñ 6-nda aqşam Rusiye arbiyleri Zaporijjâğa ücüm etip, eñ az doquz insannı öldürdi, dep bildirdi regional arbiy memuriyetniñ yolbaşçısı İvan Fedorov.
O, daa altı adam yaralanğanını, olarnıñ arasında eki bala olğanını qoştı.
«Qurtarıcılar urulğan yerlerde çalışa. Şeerniñ tibbiy müessiseleri yaralanğanlarnı qabul etmege azır», – dep yazdı Fedorov öz Telegram kanalında.
Vilâyetniñ arbiy memuriyet yolbaşçısı hızmet stantsiyasında yanğın olğanı ve regiondaki bazı cemaatlarda elektrik energiyasınen bağlı problemler aqqında da haber etti.
Rusiye arbiyleri çeşit silâlardan muntazam sürette ukrayin regionlarına ücüm ete.
Rusiye yolbaşçılığı, Rusiye ordusınıñ, büyük cenk vaqtında, Ukrayina şeerleri ve köyleriniñ grajdan infrastrukturalarına maqsatlı darbeler endirgenini, vatandaş ealisini öldürgenini ve hastahaneler, mektepler, bala bağçaları, energetika ve suv teminatı obyektlerini yoq etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.
Roskomnadzor Qırım.Aqiqat saytını blok etti.Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
