Zaporijjâ vilâyetiniñ Novodarovka qasabası rayonında Rusiye ordusı dambanı patlattı, dep bildirdi Ukrayına silâlı quvetleri Tavrik yönelişiniñ mudafaa quvetleri spikeri Valeriy Şerşen.
«Duşman açuvlana ve mında, Tavriya yönelişinde, mudafaasının yarıp keçilmesine yol bermemek içün er şey yapa. Kahovka gidroelektrostantsiyası patlatılğan soñ kiçik suv anbarlarınıñ dambaları patlatıla. Novodarovka qasabasında duşman dambanı patlattı dep haber aldıq, Mokri Yalı özeniniñ eki tarafını da suv bastı», – dep bildirdi Şerşen.
Onıñ aytqanına köre, «Tavriya yönelişiniñ Mudafaa quvetleriniñ ücüm areketlerine bu tesir etmey».
İyünniñ 6-nda tañ atqanda Kahovka gidroelektrostantsiyasınıñ qısmen patlatılğanına dair haber keldi. Ukrayına Rusiyeni qabaatlay. Ukrayına telükesizlik hızmeti iyünniñ 9-nda bir subetni aydınlattı. Berilgen malümatqa köre, Rusiye arbiyi Rusiye diversion gruppası aqibetlerini bilmeyip patlattı, dep ayta. Subetniñ doğru olıp olmağanını tasdıqlamaq imkânsız.
Ukrayına akimiyeti bildirgenine köre, Rusiye arbiyleri Kahovka gidroelektrostantsiyasına patlayıcı qoyğan edi. Ukrayına vekilleri bent tış tesirge qarşı büyük yedeknen azırlanğan edi ve içinden patlatıldı, dep qayd ete.
Kreml bentniñ patlatıluvını Kyiv tarafından yapılğan «mahsus diversiya» dep adlandıra.
Ğarp vekilleri iyünniñ 6-na keçer gecesi bentniñ yoq etilüvini izaatlap, onı Rusiye patlattı demedi, lâkin Moskva bu adisede mesüliyetli ola, dep bildirdi – çünki bıltır fevralniñ 24-nde Rusiye Ukrayınağa qarşı tam silâlı istilâ başlatıp, Herson vilâyetiniñ bir qısmını (hususan Kahovka gidroelektrostantsiyasını) işğal etti ve onı uruş alanına çevirdi.
Bentniñ patlatıluvı neticesinde aşağıda olğan yerlerni suv bastı, yuqarıda qalğan suv anbarı ise suvsız qaldı. Onlarnen mesken yerni suv bastı, insanlar tahliye etile. Rusiye tahliyege baqmadan, Hersonğa ateş açmağa devam ete.
İyünniñ 10-nda Ukrayına İç işler nazirligi bildirgenine köre, Kahovka gidroelektrostantsiyasınıñ yoq etilüvi neticesinde 29 insan ğayıp olğan olaraq sayıla.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
