Yanvarniñ 27-ne keçer gecesi Rusiye arbiyleri 104 Shahed darbe uçucısızınen ve çeşit yönelişlerden ücüm etti: Rusiye Federatsiyasında Orel, Kursk, Millerovo, Primorsko-Ahtarskaya ve işğal etilgen Qırımdaki Çavda burnndan, dep bildirdi Ukrayina Silâlı Quvetleriniñ Ava küçleri.
«Saat 09:00-da Kyiv, Mıkolayıv, Harkiv, Poltava, Sumı, Dnipropetrovsk, Hmelnitskıy, Jitomır, Vinnitsâ ve İvano-Frankivsk şeerlerinde 57 Shahed ücüm uçucısızı ve diger dronlarnıñ tüşürilgeni tasdıqlandı. 39 duşman uçucısızı coyuldı», – dep qayd etile haberde.
Ukrayina Silâlı quvetleriniñ Ava küçleri malümatına köre, Rusiye uçucısızlarınıñ ücümi neticesinde Dnipropetrovsk, Sumı, İvano-Frankivsk ve Kyiv vilâyetleri zarar kördi.
«İnfrastruktura obyektleri, çoq daireli evler ve mustaqil evler zarar kördi. Başta yaralanğanlarğa yardım etile. Mahsus hızmetler duşman ücüminiñ neticelerini yoq ete», – dep qayd etile beyanatta.
Rusiye arbiyleri Ukrayina regionlarına çeşit silâlarnen muntazam surette ücüm ete.
Rusiye yolbaşçılığı, Rusiye ordusınıñ, büyük cenk vaqtında, Ukrayina şeerleri ve köyleriniñ grajdan infrastrukturalarına maqsatlı darbeler endirgenini, vatandaş ealisini öldürgenini ve hastahaneler, mektepler, bala bağçaları, energetika ve suv teminlevi obyektlerini yoq etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
