2024 senesi sentâbrniñ 7-ne keçer gecesi Rusiye Federatsiyasınıñ quvetleri işğal etilgen Qırımda Çavda burnundan ve qomşu Rusiyeniñ Kursk ve Yeysk şeerlerinden Shahed darbe uçucısızlarınen ücüm etti. Umumen Ukrayina Silâlı quvetleriniñ radiotehnik ordusı 65 Shahed uçucısızını qayd etti, dep aytıla Ukrayina arbiyleriniñ haberinde.
«Duşmannıñ avadan ücümini keri qaytarmaq içün Ukrayina Mudafaa quvetleriniñ aviatsiya, zenit raketa ordusı, mobil ateş gruppaları celp etildi. Avada uruş neticesinde 58 darbe uçucısızı tüşürildi. Altı uçucısız Ukrayina kontrol etken ava boşluğından çıqıp, Rusiye, Beyazrusiye ve vaqtınca işğal etilgen Lugansk vilâyeti tarafına uçtı. Duşmannıñ daa üç uçucısızı Ukrayinada coyulcı (büyük ihtimalnen radioelektron küreş vastalarınıñ tesirinen tüşti)», – dep aytıla haberde.
Ukrayina Ava quvetleriniñ malümatına köre, bu gece ava mudafaası 11 vilâyette çalıştı – Vinnıtsâ, Rovno, Hmelnıtskıy, Kyiv, Kirovograd, Mıkolayıv, Çerniğiv, Çerkası, Sumı, Herson ve Poltava vilâyetlerinde.
Kyiv şeeriniñ arbiy memuriyeti haber etkenine köre, dört adreste, hususan mesken evniñ azbarına parçalar tüşti. 50 metr kârede yanğın çıqtı. Onı tez söndürgenler. Bundan ğayrı, parçalar Dnipro rayonında bala bağçasında tüşti.
Sentâbrniñ 7-nde saba Rusiye uçucısızınıñ darbesinden soñ parçalar Yuqarı Rada binası yanında tapıldı.
«Zarar qayd etilmedi», – dep yaza Ukrayina parlamentiniñ matbuat hızmeti.
Rusiye arbiyleri Ukrayina regionlarına çeşit silâlardan muntazam surette ücüm ete. Delil ve şaatlıqlarğa baqmadan, Moskva, tam bir istilâ başlağanından berli, vatandaşlarğa nisbeten yapılğan ücümlerni red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayeti olaraq tasnif etip, belli maqsadları bar, dep qayd ete.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
