Yanvarniñ 4-ne keçer gecesi Rusiye arbiyleri 81 dronnen Ukrayinağa ücüm etti. Ukrayina silâlı quvetleri olardan 34-üni atıp tüşürgenleri aqqında haber etti.
Uçucısızlar Poltava, Sumı, Harkiv, Kyiv, Çerniğiv, Çerkası, Kırovoğrad, Dnipropetrovsk, Odesa ve Mıkolayıv vilâyetlerinde yoq etildi. Daa 47 «taqlit dronı» «menfiy aqibetlersiz ğayıp oldı».
Ukrayina arbiyleriniñ malümatına köre, tüşürilgen dronlar Çerniğiv ve Sumı vilâyetlerindeki evlerge zarar ketirdi. Qurbanlarnıñ sayısı kösterilmegen.
Yanvarniñ 3-nde Rusiye arbiyleri Kyivge darbe dronlarınen ücüm etti, ücüm neticesinde yük maşinasına zarar keldi ve 1999 senesi doğğan aydavcı elâk oldı. Yanvarniñ 4-nde saba belli olğanına köre, 2002 senesi doğğan, tüşürilgen dron sebebinden yaralanğan qız hastahanede can berdi. Daa bir kişi reanimatsiyada buluna.
Yanvarniñ 1-nde Kyiv akimiyeti Ukrayina paytahtına Shahedlerniñ ücümi sebebinden eki insannıñ ölümi aqqında bildirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
