Rusiye ordusı salı kününe keçer gecesi 36 «Şahed» darbe dronunen Ukrayınağa ücüm etti, dep aytıla Ukrayına Silâlı quvetleriniñ Ava quvetleriniñ saba haberinde. Qayd etilgenine köre, dronlar işğal etilgen Qırımnıñ Çauda burnundan uçurıla.
Ukrayına tarafı haber etkenine köre, Rusiye uçurğan uçucısızlardan 27-si Odesa, Mıkolayıv ve Herson vilâyetlerinde urıp tüşürildi.
Odesa vilâyetiniñ arbiy memuriyet yolbaşçısı Oleg Kiperniñ Telegram kanalında yazğanına köre, regionda 23 dron tüşürildi, amma infrastruktura obyektine darbe oldı. Yaralanğanlar aqqında malümat yoq. Kiper ealini ava telükesine emiyet berip, sığınaqlarğa ketmege çağırdı.
Harkiv vilâyetiniñ arbiy memuriyet yolbaşçısı Oleg Sinegubov bildirgenine köre, Rusiye arbiyleri Kupânsk rayonındaki Velıkıy Burluk köyüne raketa darbesini endirdi. İlk malümatqa köre, S-300 raketası qullanıldı. Sinegubov yazğanına köre, üç yerli sakin yaralandı.
Herson vilâyetine açılğan ateş aqqında da haber etile: Ukrayına akimiyetiniñ malümatına köre, bir künde 440 snarâd atıldı. Oktâbrniñ 10-nda saba Dnipropetrovsk vilâyetiniñ Nikopol şeeri ücümge oğradı.
Ukrayına Silâlı quvetleriniñ Baş ştabı malümatına köre, Ukrayına aviatsiyası keçken künü duşmanğa 10 darbe endirdi. Rusiye tarafı bazarertesi künü Çerniğiv vilâyetindeki silâ anbarına ücüm etkenini ve çeşit yönelişlerde 11 Ukrayına ücümini keri qaytarğanını bildirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
