Noyabrniñ 17-ne keçer gecesi Rusiye ordusı Ukrayinağa Rostov vilâyetinden eki “İskander-M” ballistik raketası ve Kursk, Brânsk, Millerovo, Primorsko-Ahtarsk yönelişlerinden ve Rusiye işğal etken Qırımnıñ Çavda burnundan 128 Shahed, “Gerber” ve diger uçucısızlarnen ücüm etti, 80-i – Shahed”, dep haber ete Ukrayina Silâlı quvetleriniñ Ava küçleri.
İlk malümatqa köre, saat 09:00-ğa qadar ava mudafaası memleketniñ şimali, cenübi ve şarqında 91 Rusiye Shahed, Gerber ve diger dronını yoq etti.
Ukrayina arbiyleri 15 yerde 32 darbe uçucısızlarınıñ ücümlerini, eki yerde eki ballistik raketanıñ ücümini qayd etti. Ücüm devam ete, çünki avada daa bir qaç Rusiye uçucısızı bar, dep qoşa Ukrayina Silâlı quvetleriniñ Ava küçleri.
Yerli akimiyetniñ malümatına köre, gece Rusiye ordusı Odesa ve Harkiv vilâyetlerine ücüm etti, yaralanğan ve elâk olğanlar bar, bir qaç vatandaş gemisi zarar kördi.
Rusiye arbiyleri çeşit silâ qullanıp, muntazam sürette Ukrayina regionlarına ücüm ete.
Rusiye akimiyeti, Rusiye ordusı Ukrayinanıñ şeer ve köyleriniñ grajdan infrastruktursına maqsatlı darbelerini endirgenini red ete, sakinlerni öldürgenini ve hastahaneler, mektepler, bala bağçaları, energetika ve suv teminlevi obyektlerini yoq etkenini ayta.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.
