Rusiye ordusı oktâbrniñ 7-ne keçer gecesi 152 darbe uçucısızını uçurdı, dep haber ete Ukrayina Silâlı quvetleriniñ Ava küçleriniñ komandanlığı.
Uçucısızlar Orel, Kursk, Şatalovo, Primorsko-Ahtarsktan ve işğal etilgen Qırımnıñ Çavda burnundan uçurıldı. Bundan ğayrı, Rusiye ordusı Ukrayinağa Rostov vilâyetinden eki İskander-M/KN-23 ballistik raketasınen ücüm etti.
Darbeni aviatsiya, zenit raketa orduları, radioelektron küreş bölükleri, uçucısız sistemalar ve mobil ateş gruppaları keri qaytardı.
«İlk malümatqa köre, saat 09.00-ğa qadar, ava mudafaası memleketniñ şimali ve şarqında 88 Shahed, Gerber ve diger dronnı urıp tüşürdi/bastırdı», – dep aytıla haberde.
Ukrayina komandanlığı eki raketa ve 52 darbe uçucısızınıñ 10 yerde tükenini qayd etti, parçaları eki yerde daa tüşti.
Rusiye arbiyleri Ukrayina regionlarına çeşit silâlardan muntazam sürette ücüm ete.
Rusiye yolbaşçılığı, Rusiye ordusınıñ büyük cenk vaqtında Ukrayina şeerleri ve köyleriniñ grajdan infraterkibine maqsatlı darbeler endirgenini, vatandaş ealisini öldürgenini ve hastahaneler, mektepler, bala bağçaları, energetika ve suv teminatı obyektlerini yoq etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıy ve olarnıñ maqsatlı olğanını qayd ete.
