Rusiye arbiyleri Ukrayına cenübindeki ateşlerni quvetleştire, çünki Ukrayınanıñ qarşı ücümi sebebinden telâşlana ve Ukrayına Silâlı quvetlerine azırlıq yapmağa keder etmege tırışalar. Bu aqta Cenüpniñ mudafaa quvetleri birleşken koordinatsion matbuat merkeziniñ reberi Natalâ Ğumenük «Svoboda.Ranok» (Azatlıq Radiosınıñ leyhası) yayınında ayttı.
«Qarşı ücümni beklep telâşlanalar. Sağ taraf azat etilgende böyle faalligini endi kördik. Duşman ateşlerni quvetleştirgen edi, şimdi de öyle, meselâ, bu gece bizim yönelişimizde 50 kere ateş açıldı… Gece faal oldılar, çünki faal areketlerimizden qorqalar ya da oña azırlanmağa keder etmege tırışalar», – dedi Ğumenük.
Bundan ğayrı, onıñ aytqanına köre, Ukrayına cenübine açılğan ateşniñ diger sebebi «barışıqsever ealiniñ terrorı» ola.
«Olar barışıqsever ealige terror yapmağa devam eteler, pek uzaq regionlarda bile. Çünki, hatırlatam, gibrid cenk kete, qan sevgen diktator memleketniñ siyasiy akimiyetini de devirmege istey. Yani uzaq regionlarda terror insanlarnı açuvlandırmaq içün yapıla», – dep qoştı «Cenüp» operativ komandanlığınıñ matbuat merkeziniñ reberi.
Natalâ Ğumenük işğal etilgen Herson vilâyetinde Rusiye ordusı «güzel imağa» azırlana (Ukrayınada bu ibareni Rusiye quvetleriniñ çekilüvi içün qullanıp başladılar – QA).
Ukrayına arbiyleri 2022 senesi yazda ve küzde Herson vilâyetiniñ sağ tarafını azat etti. Vilâyetniñ merkezi 2022 senesi noyabrniñ 11-nde azat etildi. Bundan soñ Rusiye ordusı Herson ve Ukrayına ükümeti kontrol etken vilâyet rayonlarına toptan ateş etip başladı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
