Rusiye arbiyleri memleketniñ şarqında Ukraina arbiyleriniñ pekitilgen mevamlarını sarıp almağa tırışqanına oşay. Bu aqta aprelniñ 26-nda saba Büyük Britaniya Mudafaa nazirligi derc etken Britaniya istihbaratınıñ esabatında aytıla.
Qayd etilgenine köre, Kremenna Rusiye arbiyleri tarafından zapt etildi, İzümniñ cenübinde zor uruşlar kete, Rusiye ordusı ise Slavânsk ve Kramatorskqa şimalden ve şarqtan ilerilemege tırışa.
Britaniya istihbaratınıñ malümatına köre, Ukraina Silâlı quvetleri Zaporijjânı Rusiye ordusınıñ cenüpten ücüm eteceginden qorumağa azırlana.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Aprelniñ başında Moskva Ukrayina şimalinde faal olğanını toqtattı, dep bildirdi. Tezden Ukrayina akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3f6698iwwkivl.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
