Martnıñ 27-nde Rusiye ordusı Donetsk vilântiniñ Slovyansk şeeriniñ merkezine ateş açtı. Yerli akimiyetniñ malümatına köre, Rusiye arbiyleri şeerge C-300 raketalarını attı. Yıqılğan binalar bar, eki insan elâk oldı, 29 kişi yaralandı.
Slovyansk şeerinden foto ve videolarnı Donetsk vilâyetiniñ arbiy memuriyet yolbaşçısı Pavlo Kırılenko ve Ukrayına prezidenti Volodımır Zelenskıy derc eteler. Kırılenko aytqanına köre, beş çoq qatlı ev ve yedi mustaqil ev zarar kördi.
Ukrayına prezidenti Volodımır Zelenskıy Telegram kanalında adise yerinden video derc etti.
Donetsk vilâyetindeki Drujkivka şeerine qarşı da raketa ücümi aqqında haber etile. Darbe neticesinde bala eviniñ binası viran etildi. Berilgen malümatqa köre, anda balalar yoq edi; yaralanğanlar yoq.
Ukrayınağa qarşı istilâ başlağanından berli Moskva Rusiye arbiyleriniñ vatandaş obyektlerine darbe endirgenini inkâr ete.
Eñ büyük uruşlar şimdi Donetsk vilâyetiniñ Bahmut şeerinde ve civarlarında keçe. 2014 senesi aprel ayından iyül ayına qadar FSB polkovniki İgor Strelkovnıñ (Girkin) komandanlığı altında Rusiyege qoltutqan isyankâr otrâdları tutqan Slovyansk Bahmuttan şimaliy-ğarpta tahminen 20 kilometrde yerleşe.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
