Cenkniñ doquzıncı kününde Rusiye ordusı Kyivni qırşavlamaq ve blok etilgen meskün yerlerde tirenüvni eksiltmek içün ğayret köstere, dep haber ete Ukraina Silâlı quvetleri Baş ştabı.
«Rusiye Federatsiyası Silâlı quvetleriniñ gruppirovkaları operativ yedeklerniñ esas qısmını qullandı ve Cenübiy ve Şarqiy arbiy okruglarından qoşma quvet ve vastalarnı almaq içün azırlıq başlattı. Ekinci eşelonlar ve işğalcilerniñ operativ yedekleriniñ büyük qısmı operatsiyağa kirsetildi», – dep aytıla haberde.
- Volın yönelişinde Rusiye Federatsiyasınıñ ordusı eki Batalyon taktik gruppasınıñ quvetlerinen Poliske ve Kuhari meskün yerleri rayonlarında mudafaa areketlerine keçti. Beyazrusiyeni Ukrainağa qarşı cenkke çekmek içün sıñırda silâlı provokatsiyalar ola bile;
- Poliske yönelişinde Rusiye Federatsiyası Şarqiy arbiy okrugınıñ arbiy bölükleri on beşke qadar Batalyon taktik gruppalarınıñ küçlerinen Kozarovıçı, Vışğorod Fastiv, Obuhiv tarafına ücüm ete, Bışev, Ukrainka yönelişinde küç toplana. Poliske, Povara, Borodânka, Bışev, Göreniçi, Demidov meskün yerleri rayonlarınıñ sıñırları ile küreşte ücüm potentsialı qısmen yoq etildi. Duşmannıñ esas quvetleri Makarov rayonında blok etildi ve toqtatıldı, Rusiye Federatsiyasınıñ quvetleri Buça ve Ğostomel uçaq alanından çekildi;
- Severske yönelişinde Merkeziy arbiy okrugı ordusınıñ gruppirovkası on dörtke qadar Batalyon taktik gruppasınıñ küçlerinen ve Şimaliy flotnıñ 14 ordu okrugınen Öster, Zazimye, Berezan, Vişenki tarafına ücüm etip, Kyiv tarafında eñ çoq ğayret köstere. Aynı vaqıtta Brovarı tarafında ücümni devam ettirmek maqsadınen yañıdan gruppalav keçirile;
- Slobojanske yönelişinde Cenübiy arbiy okrugınıñ ordu gruppirovkası on altığa qadar Batalyon taktik gruppasınıñ küçlerinen Novomoskovsk tarafnda ğayretlerini birleştirip, ücüm operatsiyasını kerçekleştire. Harkiv şimalden blok etile. Balakleya zapt etildi. Rusiye Federatsiyasınıñ ordusı Ohtırka rayonında muvafaqiyetli olamayıp, esas küçlerini Gadâç ve Zenkiv rayonında qullana;
- Donetsk yönelişinde Rusiye Federatsiyasınıñ ordu gruppirovkası 8-inci ordu erkânındaki yedi Batalyon taktik gruppasınen quvetleştirilgen 1 ve 2 ordu korpuslarınıñ küçünen Novoaydarsk, Volnovaha ve Mariupol yönelişlerinde taktik muvafaqiyetni inkişaf ettirmek içün Novoaleksandrovka meskün yerine çıqtı. Tehnikaları çoq, Mariupol sarıp alındı;
- Luganskta – Starobelsk yönelişinde cenk uruşları;
- Tavrik yönelişte on beşke qadar Batalyon taktik gruppalarınıñ küçünen Rusiye Federatsiyasınıñ ordusı Mıkolayıv – Voznesensk yönelişinde ğayret köstere. Yañıdan gruppalav ve operativ yedeklerniñ bir qısmı kirsetilgen soñ Zaporijjâ yönelişinde ücüm ete, bir qısmı Mariupolge ücüm ete.
- Mıkolayıv yönelişinde Rusiye Federatsiyası Silâlı quvetleriniñ desant-ücüm bölükleriniñ operatsiyağa başladı.
«İşğalciler Mıkolayıv yönelişinde toqtatıldı, amma Voznesensk tarafında qısmen muvafaqiyetli oldı. Vaqtınca işğal etilgen Qırımdan çoq maşina tehnikasınıñ areketi qayd etile, işğalciler cinayetçilerni Mıkolayıv vilâyetinde qalabalıqlarnı teşkil etmek içün ketire. Qara deñizde Rusiye işğalcileriniñ deñiz gruppirovkası Ukraina Arbiy-deñiz quvetleriniñ çeşit quvet gruppirovkalarınıñ suv üstü quvetlerine ücüm etmek vazifesinen deñiz bazalarından çıqarıldı. Duşman Zaliv, Çernomorsk rayonında deñiz desantını endirmege azırlana. Ateş yardımı ve raketa kater darbe gruppasınıñ gemileri gruppalarnı qapata», – dep aytıla haberde.
Berilgen malümatqa köre, Ukrainanıñ desant ile küreş mudafaası sistemasını toqtatmaq içün Qara deñiz yalısında Su-24M bombardımanları celp etildi ve RBK-500 bombalarınıñ atılması qayd etildi. Su-30SM qırıcıları qullanıldı.
Ukraina Silâlı quvetleriniñ Baş ştabı bildire: bütün yönelişlerde Rusiye Federatsiyasınıñ ğayıpları bar, Rusiye arbiyleri esirlikke teslim ola ve tehnikasını taşlap kete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: rukrymr.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
