Rusiye ordusı iyünniñ 6-na keçer gecesi Kyivge qanatlı raketalarnen ücüm etti, dep bildirdi şeerniñ arbiy memuriyeti.
İlk malümatqa köre, Kaspiy deñizinde bulunğan Tu-95MS bombardıman uçaqlarından H-101/555 raketaları atıldı.
Ava mudafaa quvetleri Kyivde 20-den çoq nişannı tüşürdi, dep bildire şeer memuriyeti. «Episi tüşürildi, bir yerge ücüm etmedi», — dep aytıla haberde.
Buña baqmadan, snarâd parçaları Kyivniñ Dniprovskıy ve Desnânskıy rayonlarında tapıldı.
Desnânskıy rayonında yol, trolleybus hatları zarar kördi, tükân camları qısmen qırıldı. Dniprovskıy rayonında mustaqil evniñ damında raketa parçaları bar — ilk malümatqa köre, zarar körgenler yoq.
Ukrayına Mudafaa nazirliginiñ Baş istihbarat idaresi Rusiye halqara sanktsiyalarğa baqmadan, raketa atmağa devam ete, dep bildirdi. Baş istihbarat idaresiniñ malümatına köre, Moskva ayda tahminen 25 «Kalibr», H-101 – 35 dane, ayda eki «Kinjal», 5 dane «İskander-M» ballistik raketasını işlep çıqara bile.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
