Dekabrniñ 11-ne keçer gecesi Rusiye arbiyleri Kyivge ücüm etti, yaralanğanlar bar, dep haber ete Ukrayına akimiyeti.
Kyiv şeeriniñ arbiy memuriyeti bildirgenin köre, ava mudafaasınıñ işi neticesinde Darnıtskıy ve Ğolosiyıvskıy rayonlarında parçalar tüşti.
Darnıtskıy rayonındaki mesken evde camlar qırıldı, ilk malümatqa köre, cam parçaları balanı ve eki büyükni yaraladı, dep bildirdi Kyiv şeeriniñ arbiy memuriyet yolbaşçısı Serğiy Popko.
Ukrayına paytahtınıñ şeer yolbaşçısı Vitaliy Klıçko malümatına köre, parça Darnıtskıy rayonında qurulayatqan binağa zarar ketirdi. Yanğın endi söndürildi. Daa bir parça otqa tüşti.
Klıçko dört yaralanğan kişi aqqında bildirdi.
«Dört insan – episi büyük – Darnıtskıy rayonında duşmannıñ raketa ücümi neticesinde yaralandı. Ekimler adise yerinde yardım kösterdi», – dep aytıla şeer yolbaşçısınıñ haberinde.
Kyiv şeeriniñ arbiy memuriyet yolbaşçısı Serğiy Popko malümatına köre, yaralanğanlar – 1992 senesi doğma erkek ve 1963, 1990 ve 1992 seneleri doğma üç qadın.
Klıçko raketa parçası Darnıtskıy rayonındaki anbar tükânda tapıldı, dep bildirdi. Yanğın ve zarar olmadı.
Ukrayına Ava quvetleri Kyivge uçqan sekiz nişan yoq etildi, dep bildirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
