Rusiye arbiyleri quvetlerini Kyivge çeke, şeer mudafaağa azırlana. Bu aqta paytahtnıñ yolbaşçısı Vitaliy Kliçko martnıñ 2-nde soñki malümatqa esaslanıp bildirdi.
«Duşman quvetlerini paytahtqa yaqın çeke. Gece Bila Tserkvağa ateş açtı, Buça ve Ğostomelde uruşlar devam etti. Şeerimizni mudafaa etmege azırlanamız», – dedi şeer yolbaşçısı.
O, kyivlilerni sahte malümatqa inanmamağa ve resmiy menbalardan malümat almağa çağırdı.
«Tek resmiy resurslarğa işanıñız! Kyiv tura ve turacaq. Biz talaşacaqmız!», – dep qoştı Kliçko.
Paytahtnıñ şeer yolbaşçısı tünevin tele qullesine açılğan ateş aqqında hatırlattı. Bunıñ neticesinde beş insan vefat etti. O, şeerlilerni acele bir şey olmasa, soqaqqa çıqmamağa, signal olsa, sığınaqqa ketmege ve komendant saatına riayet etmege çağırdı.
Kliçko aytqanına köre, paytahtnıñ kritik infrastrukturası, cemaat naqliyatı çalışa, amma ilk evelâ müim müessiselerniñ hadimlerini taşımaq içün.
Şeer yolbaşçısı, Kyiv Rusiye ordusından mudafaa etilgen Buçağa gumanitar yardım, hususan ilâc yolladı, dep bildirdi. Kliçko, Qızıl haç Halqara komitetine yükni alıp ketkeni içün teşekkürler bildirdi.
Vitaliy Kliçko martnıñ 1-nde Ukraina paytahtındaki vaziyet Rusiye arbiyleriniñ areketleri sebebinden telükeli ola, dep ayttı.
