Rusiye ordusı martnıñ 12-nde aqşam Krıvıy Riğde çoq qatlı binağa raketa darbesini endirdi, dep haber ete Ukrayına akimiyeti.
Berilgen malümatqa köre, darbe neticesinde üç insan elâk oldı, daa 38 kişi yaralandı.
Dnipropetrovsk vilâyetiniñ arbiy memuriyet yolbaşçısı Serğiy Lısak bildirgenine köre, yaralanğanlar arasında al-azırda on bala bar.
«Şimdi Krıvıy Riğde duşma ücüminden zarar körgen tek 10 bala aqqında malümat bar. Umumen 38 kişi yaralandı», – dep yazdı Lisak Telegramda.
Ukrayına Baş prokurorınıñ ofisi bildirgenine köre, ücüm neticesinde eki çoq qatlı mesken ev zarar kördi.
Ukrayına İç işler nazirliginiñ malümatına köre, qıdıruv-qurtaruv işleri devam ete.
Fevralniñ 21-ne qadar BM aman-aman 2 yıl devam etken Rusiyeniñ Ukrayınağa qarşı büyük istilâsı neticesinde 10582 insan elâk oldı, daa 19875 kişi yaralandı. Teşkilât ölgen vatandaşlarnıñ sayısı daa çoq, dep tahmin ete.
Rusiye arbiyleri çeşit silâlardan – dron, raketalar, RSZO - Ukrayına regionlarına muntazam surette ücüm ete. Yanvar ayında Rusiye ücümlerini quvetleştirdi, neticede onlarnen insan elâk oldı, yüzlernen insan yaralandı.
Moskva, isbat ve şaatlıqlarğa baqmadan, tam cenk başlağanından berli Ukrayınada vatandaşlarğa ateş açılğanını red ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
