Avgustnıñ 7-ne keçer gecesi Rusiye ordusı Herson merkezinde mesken evlerge üç kere ücüm etti, bir qadın elâk oldı, dep bildirdi vilâyetniñ arbiy memuriyet yolbaşçısı Oleksandr Prokudin.
Onıñ aytqanına köre, saat 00.50-de Rusiye arbiyleri mesken evge ateş açtı. Sekiz sakininiñ vaziyet-nevrotik cevabı qayd etildi. Bir kişi hastahanege alındı.
Yanğın söndürilgende eki qurtarıcı zarar kördi. Olarnı hastanege alğanlar, dep aytıla haberde.
Ateş devam etti – toplarnıñ evge ücüm etmesi neticesinde 59 yaşında qadın can berdi, 60 yaşında adamnıñ kontuziyası oldı.
Bundan ğayrı, saat 03:15-lerde Rusiye ordusı mesken evge kene ücüm etti. Neticede 93 yaşında qadın yaralandı. Onı mayın-patlayıcı yaralarnen ve kontuziyanen hastahanege alğanlar, dep ayttı vilâyetniñ arbiy memuriyet yolbaşçısı.
Rusiye arbiyleri raketa, uçucısızları, topları yetken Ukrayına şeerlerine muntazam sürette ateş aça. Delillerge baqmadan, Rusiye vatandaş ve arbiylerge qarşı cenk cinayetleri alâqası olğanını inkâr ete.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
