Rusiye ordusı Hersonğa ateş açtı, 67 yaşında erkek elâk oldı, dep haber ete Herson vilâyetiniñ prokuraturası.
Snarâdlardan biri mesken evge tüşti. Cenk qanunları ve adetlerini bozuv ve öldürüv sebebinden (Ceza kodeksiniñ 438-inci maddesiniñ 2-nci qısmı) Ukrayına uquq qoruyıcıları cinaiy dava başlattı.
Şeerniñ arbiy memuriyet yolbaşçısı Roman Mroçko avtobusqa ateş açıldı, dep bildirdi. Onıñ aytqanına köre, camları qırıldı. Yaralanğanlar aqqında malümat yoq.
Herson şeeri 2022 senesi küzde işğalden azat etilgen soñ Rusiye ordusınıñ ateşleri toqtamay. Noyabrniñ 14-nde Herson vilâyetiniñ Korabelnıy rayonında Rusiye ücümi neticesinde 54 yaşında qadın yaralandı. Onı miy sarsuvı, çeke ve qol yarasınen hastahanege alğanlar. Herson vilâyetindeki Osokorivkada 66 yaşında adam yaralandı, ateş vaqtında evinde edi. Beti ve ayaqları yaralandı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
