Harkiv vilâyetinde territorial mudafaa batalyonlarından biri Rusiye arbiylerini çetleştirdi ve Rusiye ile devlet sıñırına barıp çıqtı, dep bildirdi mayısnıñ 16-na keçer gecesi Ukraina Mudafaa nazirligi Facebookta.
«Ukraina Silâlı Quvetleri Harkiv territorial mudafaa quvetleriniñ 127-nci brigadasınıñ 227-nci batalyonı rusiyelilerni çetleştirip, devlet sıñırına barıp çıqtı», – dep aytıla haberde.
Mudafaa nazirligi aydınlatqan videoda Ukraina arbiyleri prezident Volodımır Zelenskıyge sıñırğa çıqqanını bildire.
Mayısnıñ 12-nde Britaniya istihbaratı Ukraina ordusı Harkiv şimalinda qarşı ücümni devam ettire, dep bildirdi. Rusiye ordusınıñ Harkiv vilâyetinden çekilüvi Rusiyeniñ esas Ukraina şeerlerini zapt etip olamağanınen «sessiz bir razılıq» ola, anda olar eali o qadar tirenecegini tüşünmegen ediler.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Aprelniñ başında Moskva Ukrayina şimalinde faal olğanını toqtattı, dep bildirdi. Tezden Ukrayina akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net . Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
