Rusiye ordusı Harkivniñ merkezine raketa darbesini endirdi, eki raketa otel binasına ücüm etti, dep haber etti şeer yolbaşçısı İgor Terehov.
Ukrayınanıñ fevqulâde vaziyetler devlet hızmetiniñ malümatına köre, bu yanvarniñ 10-nda saat 22:30-larda oldı.
Terehov binada arbiy yoq edi, anda 30 vatandaş bar edi, dep qayd ete. 11 insan yaralandı, aralarında Türkiye jurnalistleri bar. Yaralanğanlar hastahanege alındı, bir kişi ağır alda.
Otelden ğayrı kommunal ev ve bir mustaqil ev, maşina salonı ve sanayı müessisesi zarar kördi.
Harkiv vilâyetiniñ memuriyet yolbaşçısı Oleg Sinegubov bildirgenine köre, ilk malümatqa köre, darbeler S-300 raketalarınen endirildi.
Dekabrniñ soñundan başlap Rusiye Ukrayınağa qarşı raketa ateşlerini quvetleştirdi. Rusiye quvetleriniñ soñki büyük ücümi vaqtında yanvarniñ 8-nde 4 insan elâk oldı, daa 38 kişi yaralandı. Ukrayına Silâlı quvetleriniñ Ava küçleri hususan Qırımdan qanatlı ve ballistik raketalar uçurıldı, dep bildirdi. Ukrayınanıñ bir çoq şeerinde patlavlar ve ava mudafaa quvetleriniñ işi aqqında haber etildi.
Ukrayına Silâlı quvetleriniñ malümatına köre, Rusiye arbiyleri yanvarniñ 8-nde saba Ukrayınağa qarşı 51 raketanı uçurdı, 18-ini urıp tüşürgenler.
Rusiye arbiyleri işğal altındaki Ukrayına topraqlarını, şu cümleden mülkiy obyektlerni muntazam sürette ateşke tuta. Delillerge baqmadan, Moskva bu darbelerniñ maqsadı Ukrayınanıñ arbiy infraterkibi olğanını iddia ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
