Rusiye ordusı oktâbrniñ 7-nde aqşam Dnipropetrovsk vilâyetiniñ Nikopol rayonına ateş açtı, dep bildirdi Dnipropetrovsk vilâyetiniñ arbiy memuriyet yolbaşçısı Valentin Rezniçenko.
«Grad» ve ağır toplarnen ücüm ettiler. Krasnogrigoryevde 37 yaşında erkek öldürildi, 42 yaşında erkek yaralandı. O, hastahanede yata», – dep yazdı Rezniçenko Telegram kanalında.
Saba Rezniçenko Nikopol rayonı bütün gece «patlavlardan abdıradı», dep haber etti: Rusiye ordusı toplu ateş raketa sistemalarından ve ağır toplardan rayonğa altı kere ücüm etti. İlk malümatqa köre, yaralanğanlar yoq.
«Nikopolge tahminen 40 Rusiye snarâdı tüşti. Şeerde bir qaç çoq qatlı bina, ondan çoq mustaqil ev, hocalıq inşaatları, naqliyat infrastrukturasınıñ müessisesi, gaz boruları ve elektrik hatları zarar kördi», – dep bildirdi Dnipropetrovsk vilâyetiniñ arbiy memuriyet yolbaşçısı.
Rusiye ordusı Dnipropetrovsk vilâyetine muntazam sürette ateş aça. Keçken afta Rusiye raketa darbesi neticesinde Dniproda, vilâyetniñ arbiy memuriyeti bildirgenine köre, beş insan yaralandı, dört kişi elâk oldı, ekisi – bala. Bu ücüm neticesinde 60-tan çoq mustaqil ev ve bir qaç çoq qatlı ev, elektrik hatı, maşina naqliyatı zarar kördi.
Moskva Ukrayınada vatandaşlarğa ücüm etkenini inkâr ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
