Rusiye Federatsiyasınıñ ordusı Kupânsk, Liman, Bahmut, Avdiyıvka ve Şahter yönelişlerinde esas ğayretlerini köstere, dep aytıla Ukrayına Silâlı quvetleriniñ Baş ştabı malümatında.
«(Rusiye ordusı – QA) Donetsk vilâyetiniñ Orehovo-Vasilovka, Dubovo-Vasilovka, Bahmut, Kamenka, Avdiyıvka ve Maryınka rayonlarında muvafaqiyetsiz ücüm areketlerini devam ettire. Keçken künü imayecilerimiz bu yönelişlerde 100-den çoq ücümni urıp qaytardı», – dep aytıla haberde.
Berilgen malümatqa köre, Bahmut yönelişinde Rusiye ordusı çoq zarar körse de, Bahmutqa ücüm etmege devam ete.
Martnıñ 6-nda prezident Volodımır Zelenskıy memleketniñ arbiy-siyasiy reberligi Bahmutnı imaye etmege devam etmege qarai berdi, dep bildirdi.
Bahmut cebeniñ esas sıcaq noqtası olıp qala. Rusiye ordusı 2022 senesi iyül ayından berli, qomşu Lugansk vilâyetiniñ büyük qısmını (Severodonetsk, Rubejne, Lısıçansk) işğal etkende, şeerni zapt etmege tırışa. Yanvar ayında Bahmutqa yaqın mevzilerden Rusiye arbiyleri ve yalçıları faal ücüm başlattı. Arbiy talilciler aman-aman bütünley yoq etilgen Bahmutnıñ zapt etilüvi Rusiye ise timsaliy bir emiyet taşıy, amma strategik ceetten müim degil, dep ayta.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
