Rusiye ordusı Ukrainağa ücüm etkeninden berli memleketniñ altı vilâyetinde 28 kilse, cami ve sinagoga viran etildi, dep bildire Ukraina etnosiyaset ve vicdan azatlığı devlet hızmeti.
Müessise bildirgenine köre: «Kreml propagandacıları ortodokslıqnı qoruv tezislerinen öz imperiya isteklerini tsinik bir şekilde» gizley, Rusiye ordusınıñ tecavuzcı ücümi Ukraina pravoslav ve diger din cemiyetleriniñ ibadethanelerini viran ete».
«Ukrainanıñ altı vilâyetinde eñ az 28 diniy inşaat (yaqınındaki binalar sayılmay) zarar kördi: Kyiv, Donetsk, Jıtomır, Lugansk, Harkiv ve Çerniğiv. Çoqusı – ortodoks kilseleridir», – dep aytıla haberde.
Müessise Rusiye arbiyleri yıqqan kilse ve diger diniy yerlerniñ cedvelini berdi.
Fevralniñ 24-nde saba saat 5-te Rusiye prezidenti Vladimir Putin «DNR» ve «LNR» gruppirovkalarınıñ «muracaatından» soñ Donbasta «mahsus operatsiya» başlatqanını ilân etti. Bundan soñ Kyiv, Harkiv, Odesa, Kramatorsk, Berdânskta patlav ve raketa darbeleri aqqında haber etildi.
Ukraina prezidenti Volodımır Zelenskıy umumiy seferberlik buyruğını imzaladı. Ğarp memleketleri Ukrainağa yapılğan ücüm sebebinden Rusiyege qarşı yañı sanktsiyalarnı qullanıp başladı.
Doğrudan ücümge baqmadan, Kreml Ukraina işğali niyetini inkâr ete. Rusiye Mudafaa nazirligi Ukraina tarafınıñ tüşürilgen Rusiye uçaqları, patlatılğan zırhlı tehnika, Rusiye arbiyleriniñ ölümleri aqqında malümatını red ete ve Ukraina şeerlerine ateş açılmay, dep bildire.
Rusiye Mudafaa nazirligi Ukraina tarafınıñ tüşürilgen Rusiye uçaqları, patlatılğan zırhlı tehnika, Rusiye arbiyleriniñ ölümleri aqqında malümatını red ete ve Ukraina şeerlerine ateş açılmay, dep bildire. Başta Rusiye arbiyleri ölgenini inkâr ettiler. Amma fevralniñ 27-nde Rusiye Federatsiyası Mudafaa nazirliginiñ resmiy vekili İgor Konaşenkov Ukrainada ölgen ve yaralanğan Rusiye askerleri bar, dep ayttı. Sayısını aytmadı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: rukrymr.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
