Rusiye ordusına askerlikke alınğan Qırım sakinleri esas Ukrainada cinaiy taqipke oğratılmaycaq. Bu aqta Qırım Muhtar Cumhuriyetiniñ prokurorı İgor Ponoçovnıy bildirdi.
«Halqara gumanitar uquqınıñ normalarına köre, Rusiye Silâlı quvetlerine askerlikke alınğan qırımlılar, aksine, işğalci devlet memurlarınıñ qanunsız areket qurbanları ola», – dedi Ponoçovnıy.
O, Rusiye ordusında askerlik yapmasına mecbur etilgen yarımada sakinlerini Qırım Muhtar Cumhuriyetiniñ Prokuraturasına muracaat etmelerine çağırıp, böyle insanlar zarar körgen şahıs statusını alacaq, dep işandırdı.
Ukrainanıñ Birleşken Milletlerdeki daimiy temsilciligi BM baş kâtibini işğal etilgen Qırım sakinleriniñ baarde Rusiye ordusına alınmasına seslenmesine çağırğan edi.
Aprelniñ 4-nde Rusiye Mudafaa nazirliginiñ bildirgenine köre, 3 300 qırımlı askerlikke alınacaq. Askerlerniñ ekseriyeti Qırımnıñ tışına, qomşu Rusiyeniñ Cenübiy ve diger arbiy okruglarındaki arbiy bölüklerine yollanılacaq, dep qayd etile.
Human Rights Watch halqara aq qorçalayıcı teşkilâtınıñ bildirgenine köre, 2019 senesi baarde askerlikke çağırılğan qırımlılarnıñ yüzde seksen beşi qomşu Rusiyeniñ bazalarına yollanıldı.
Amerika Birleşken Devletleri, Rusiye ordusında askerlik yapmağa istemegen qırımlılarğa qarşı cinaiy davalar açılğanından qasevetlengenini bildirdi.
