Uydu resimleri, Rusiye ordusınıñ arbiy poligonı yerleşken Çauda burnu rayonında yanğın meydanı bir qaç kere arttı, dep köstere. Bu aqta Azatlıq Radiosı bildire.
İyünniñ 25-nde ve 26-nda yapılğan uydu resimleriniñ qıyaslaması, yanğınğa oğrağan topraqnıñ bayağı artqanını köstere, neticede ateş arbiy bölükniñ binalarına qadar yetken.
Qırımnıñ arbiy obyektleri haritasından körüne ki, Çauda burnunda RF ordusınıñ yalı ve ava mudafaası yerleşe. Bundan da ğayrı, ukrayin arbiyleri, Rusiyeniñ Ukrayinada "Şahed/Geran" tipindeki barraj cephaneliklerini bu yerden endirgenini iddia ete ediler.
Rusiye arbiyleri 2022 senesi noyabrniñ 1-nden 2023 senesi mayısnıñ 30-na qadar qırımlılarğa Çauda burnu territoriyasına kirişni yasaq etti. Rusiye kütleviy haber vastalarında, anda sınav işlerini temin etmek içün tedbirler keçirilecek, dep yazılğan edi.
Qırım.Aqiqat mühbiri burun civarındaki yanğın aqqında haber etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
