Qırımda "Rusiye ordusını itibardan tüşürüv" ile qabaatlanğan faal Sergey Akimovnı Qırımdaki Rusiye FSB-si bölügine ketirip, sorğuğa çekkenler. Bunı Akimov Qırım.Aqiqatqa haber etti.
Akimovnıñ aytıp bergenine köre, martnıñ 31-nde onı Rusiye İİN Esktremizm ile küreş merkeziniñ hadimleri Rusiye FSB-siniñ bölügine ketigenler. Bu, Rusiye polisi Akimovnıñ maşnasındaki cenkke qarşı plakat içün oña qarşı memuryi protokol tizgen soñ olğan.
Faal, rusiye quvetçileri manşasını baqıp çıqqanlarını bildirdi. FSB-de onı 8 hadim sorğuğa çekken.
Resmiy olaraq, Rusiye FSB-si ve İİN Akimovğa diar er angi bir areket aqqında malümat bermedi.
Akimov, Ukrayinada "Rusiye ordusını itibardan tüşürüv" aqqında memuriy protokol boyunca mahkeme qararını beklegenini haber etti.
Haber etilgeni kibi, Akimovğa 30 biñden 50 biñge qadar para cezası berile bile.
Rusiyeniñ nezaretinde olğan Qurman rayon mahkemesi saba Qırımda küyeçirilgen tintüv vaqtında yaqalanğan Qırımtatar Milliy Qurultayınıñ Merkeziy saylav komissiyasınıñ reisi Zair Smedlâğa 40 biñ ruble para cezasını berdi. O, Rusiyeniñ Ukrayinağa cenki vaqtında "Rusiye ordusını itibardan tüşürüv" ile qabaatlandı.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Mesken rayonlarğa top, çoqlu ateş sistemaları ve ballistik raketalar vastasınen ateş açıla. Rusiye ordusınıñ zırhlı tehnikası Kıyiv ve Rusiye sıñırına yaqın bir qaç vilâyet merkezini sarıp almağa tırışa.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3enufiq6nhnir.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
