Ukraina Tış işler naziri Dmıtro Kuleba Ukraina-NATO komissiyasınıñ nevbetten tış toplaşuvına baracaq. Bu aqta Ukraina Tış işler nazirligi bildire. Ziyaret vaqtında o, NATO baş kâtibi Jens Stoltenberg ile körüşecek.
«Ukraina Tış işler naziri ve NATO azaları Rusiye Federatsiyası tarafından Rusiye-Ukraina sıñır boyu ve vaqtınca işğal etilgen Qırımda telükesizlik vaziyetiniñ kerginleştirilüvini, Şimaliy atlantik ittifaqnıñ devletimizniñ suvereniteti ve topraq bütünligine qol tutuv yollarını muzakere etecekler», – dep bildirdi nazirlik.
Martnıñ 30-nda Ukraina silâlı quvetleriniñ baş komandanı Ruslan Homçak bildirdi ki, Rusiye, «Zapad-2021» strategik talimlerine azırlıq manaçığınen Ukrainanıñ şarqiy sıñırlarına taktik gruppalarını çeke. Kreml, Rusiye ordusınıñ Rusiyede areket etmesi diger memleketlerni, hususan Ukrainanı qasevetlendirmemeli.
Ukrainanıñ ğarbiy ittifaqdaşları oña qol tutqanını bildirdi. Aprelniñ 2-nde ABD ve Ukraina prezidentleri Joseph Biden ve Volodımır Zelenskıy telefonda laf ettiler. Beyaz saraynıñ malümatına köre, «prezident Biden Rusiyeniñ Donbas ve Qırımdaki istilâsı vaziyetinde Ukraina suvereniteti ve topraq bütünligine qol tutqanını tasdıqladı».
Daa soñra Avropa Birliginiñ Tış siyaset ve telükesizlik siyaseti yuqarı temsilcisi Josep Borrell Ukraina akimiyetini Rusiye tarafından yapılğan istilâ vaziyetinde «Avropa Birligi destek köstergenine» işandırdı.
Sıñırda ve Donbasta olğan adise-vaqialar sebebinden NATO da Ukrainağa qol tutqanını bildirdi.
