Rusiye ordusı saban ayınıñ 24-nde Sumığa ücüm etti, dep bildirdi vilâyetniñ arbiy memuriyetiniñ yolbaşçısı Volodımir Artüh.
Radio Svoboda mühbiriniñ malümatına köre, darbe neticesinde yaralanğanlar bar. Daa soñra şeer yolbaşçısınıñ vazifesini eda etken Artem Kobzar 28 insan yaralandı, olarnıñ arasında dört bala bar, dep bildirdi.
Artühnıñ aytqanına köre, Rusiye ordusı şeerniñ merkezine raketa ile urdı, bir qaç çoq qatlı bina zarar kördi. Zarar körgen yerde mektep de bar edi, balalar qoruv binasında edi ve zarar körmedi, şimdi olarnı tahliye eteler. Qurtarıcı hızmetler yanğınnı söndürmek içün çalışalar.
Daa soñra şeer akimiyeti 74 insan, şu cümleden 13 bala zarar körgenini bildirdi. Çoq qatlı mesken evler zarar kördi. Sekiz evde gaz, 18 evde sıcaq suv ve qızdıruv, 6 evde suvuq suv yoq.
Rusiye arbiyleri Ukrayina regionlarına çeşit silâlarnen muntazam surette ücüm ete.
Rusiye akimiyeti, Rusiye ordusı Ukrayinanıñ şeer ve köyleriniñ grajdan infrastrukturalarına, hastahaneler, mektepler, bala bağçaları, energetika ve suv teminlevi obyektlerine ücüm etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
