Ukrayina silâlı quvetleriniñ Baş ştabı dekabrniñ 17-nde saba saatlarında, Rusiye arbiyleri öz bölükleriniñ işğal etilgen Kahovka ve Yañı Kahovkadan köçürilmesi ile oğraşqanı ve yılnıñ soñunace Kahovkanı terk etmek niyetinde olğanları aqqında bildirdi.
"Duşman bazı bölüklerini köçüre ve ordusınıñ bir qısmını Herson vilâyetindeki Kahovka ve Yañı Kahovkadan Nıjni Sirogozı meskün yerine çeke. Yerli sakinler arasında arbiyler Rusiye ordusı yılnıñ soñunace Kahovkanı terk etecekleri aqqında malümat darqatalar ve işğalcilerge loyal olğanlarnı muvaqqat işğal etilgen Ukrayina Qırımına köçmege teklife teler", - dep yazıla bildirmede.
Yañı Kahovkada Rusiye tarafından tayin etilgen memuriyet noyabrniñ ortasında onıñ hadimleri şeerni terk etip, Herson vilâyetiniñ daa telükesiz rayonlarına köçmek mecbur olğanlarını bildirgen edi.
Yañı Kahovka ve Kahovka Dnipro özeniniñ sol sailinden yerleşken Herson vilâyetiniñ şeerleridir.
Herson ve vilâyetniñ bir qısmını Rusiye arbiyleri martnıñ başında işğal etti. Noyabrniñ 11-nde Ukrayina Mudafaa nazirligi Herson Ukrayina ordusınıñ kontroline qayta, dep bildirdi. Şeerniñ merkezinde Ukrayina bayrağı köterildi. Ukrayina arbiyleriniñ malümatına köre, Herson vilâyetinde Dnipronıñ sağ tarafında soñki afta içinde 4,5 biñ metr kârede 179 mesken yer işğalden azat etildi.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
