Rusiye arbiyleri oktâbrniñ 9-nda aqşam Odesa vilâyetine raketa darbesini endirdi. Bu aqta Ukrayina baş nazir muavini — cemiyetler ve topraqlar inkişafı naziri Oleksiy Kuleba bildirdi. Yedi insan elâk olğan, daa 11 yaralanğan.
Onıñ malümatına köre, Odesa vilâyetiniñ liman infrastrukturasına darbe ballistik raketalarınen yapılğanç
"Shui Spirit" konteyner gemisi zarar kördi. Bu, soñki dört kün içinde Rusiye tarafından ücüm etilgen üçünci ecnebiy gemidir", — dep yazdı o Telegram kanalında.
2024 senesi oktâbrniñ 6-ndan başlap Rusiye arbiyleri Odesa vilâyetine, şu cümleden liman infrastrukturasına er kün raketa ve pilotsız uçaqlarnen ücüm ete. Böylece, Rusiye ordusı oktâbrniñ 7-nde Odesa ticaret limanına ballistik raketalarınen urdı. O vaqıt bir insan elâk oldı, Palau bayrağı altında olğan ticaret gemisi ateşke oğradı. Beş insan yaralandı, dörtü ağır alda. Olarnıñ episi çetel vatandaşlarıdır.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
