Mayısnıñ 1-ne keçken gecesi Rusiye ordusı Odesa merkezine ballistik raketalarnen ücüm etti. Bu aqta vilâyet memuriyetiniñ yolbaşçısı Oleğ Kiper bildirdi.
Memurnıñ aytqanına köre, ücüm neticesinde üç insan elâk oldı, olarnıñ arasında bir politsiya hadimi bar. Daa üçü yaralandı. Şeer yolbaşçısı Gennadiy Truhanov bildirdi ki, raketa darbesinden grajdan infrastruktura ve mesken evler zarar kördi.
Rusiye Mudafaa nazirligi Odesağa ücümni izaatlamadı.
Aprelniñ 29-nda Ukrayina akimiyeti, Rusiye, tahminlerge köre, kassetka silâsınen ballistik raketalarnen darbe endirdi, dep bildirdi. Beş yerli sakin elâk oldı, 32 insan yaralandı, 25-i hastahanege alındı, qalğanlarına ise anda yardım etildi. Mesken evler ve grajdan infrastruktura zarar kördi. Odesa uquq akademiyasınıñ studentler sarayında yanğın çıqtı.
Rusiye Ukrayinağa 2022 senesi fevralniñ 24-nde ücüm etti. Birleşken Milletler Teşkilâtınıñ malümatına köre, Ukrayinadaki cenkniñ eki yılı içinde on biñden ziyade insan öldürildi, aman-aman yigirmi biñ yaralandı. BMT Rusiye arbiyleri tarafından vatandaşlarnıñ öldürüvi, hırsızlavı, işkence, zorbalıq ve yañlış tevqif etilüvini qayd etti.
Rusiye Mudafaa nazirligi, tek arbiy obyektlerge ücüm etkenini iddia ete. Rusiye komandanlığı barışıq sakinleriniñ ölümi ve grajdan infrastrukturasınıñ yoq etilmesini izaatlamay.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
