Rusiye ordusı Kramatorsk ve Krıvıy Riğ hastahanelerine ücüm etti, sekiz insan yaralandı, dep bildire baş nazir Serğiy Koretskiy.
"Kramatorskta şeer hastahanesine ücüm neticesinde üç acele tibbiy yardım hadimi yaralandı, üç acele yardım maşnası yoq etildi. Aynı şu saba duşman Krıvıy Riğ şeeriniñ hastahanesine ücüm etti, beş insan yaralandı", — dep yazdı o telegramda.
Umumen, onıñ aytqanına köre, Rusiye ücümlerine bu gece sekiz vilâyet ve Kıyiv oğrağan.
Ukrayina Fevqulâde vaziyetler devlet hızmetinde qoştılar ki, Rusiyeniñ dron ücümleri sağlıq saqlav müessisesiniñ territoriyasında yanğınğa sebep olğan: "acele yardımnıñ" 3 maşnası yanğan. Üç adam yaralanğan. Qurtarıcılar yanğınnı söndürgenler.
Cenkni ögrenüv institutı (ISW) 2026 senesi İlk küzniñ soñunda faalleşken Rusiye ücümlerinden Ukrayina zarar köre, dep bildire. Rusiye ordusı Kıyivdeki köpürlerge ücümlerini arttırdı, Orta küzniñ 1-den 4-ne qadar paytahtnıñ Şimaliy ve Cenübiy köpürlerine yedi kere ücüm etip, Ukrayina iqtisadiyatını bozmağa ve vatandaşlarnıñ kündelik ayatını bozmağa tırıştı.
Rusiye arbiyleri Ukrayina regionlarına muntazam sürette ücüm ete, çeşit silâ qullana – uçucısız, raketa, KAB, reaktik toplu atış sistemaları.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tasnif ete ve olarnıñ maqsadı bar, dep qayd ete.
İnsanlarnı elektrik energiyası, sıcaq, su, bağ, tibbiy yardım ve yaşayış içün diger kerekli şaraitlersiz qaldırmaq içün eali yaşayışını teminlev sistemaları ve sağlıq müessiselerine qarşı ateşler genotsid areketleriniñ alâmetlerini taşıy.
Rusiye reberligi Rusiye ordusı büyük cenk vaqtında Ukrayinanıñ şeer ve köylerinde vatandaş infrastrukturasına qarşı darbe endirgenini, vatandaşlarnı öldürgenini ve hastahane, mektep, bala bağçaları, energetika ve suv obyektlerini yıqqanını inkâr ete.