Rusiye ordusı Hersonğa yanvarniñ 9-nda aviatsiya yardımınen ücüm etti, dep bildire vilâyet ve şeerniñ arbiy memuriyetiniñ yolbaşçıları.
Herson şeeriniñ arbiy memuriyetiniñ yolbaşçısı Roman Mroçkonıñ malümatına köre, Rusiye ordusı şeerde idare etilgen üç bomba attı:
"KAB şahsiy evge urdı ve onı viran etti. Dağıntılar altından bir erkek ve qadınnı çıqardılar, olarnı acele yardım alıp ketti. 85 yaşında yaralanğan qadınnıñ, patlav ve qapalı qafa-beyin travması bar. Daa bir zarar körgen kişiniñ stresske keskin reaktsiyası bar".
Ava ücümi yanğınlarğa sebep oldı, em de müessise ve bala bağçalarına urulğanı qayd etildi.
Daa soñra Mroçko, darbe neticesinde daa beş yaralanğan kişi aqqında bildirdi. Olardan biri, 52 yaşında erkek, hastahanege ketirildi — onıñ yüzünde yara, patlav ve qapalı qafa-beyin travması bar.
Herson vilâyetiniñ arbiy memuriyetiniñ yolbaşçısı Aleksandr Prokudin bildirdi ki, yanvarniñ 9-nda gece ve saba Rusiye ateş açqanı neticesinde dört insan elâk oldı, daa on kişi yaralandı.
Onıñ aytqanına köre, eki çoq qatlı bina ve dört şahsiy ev zarar kördi.
Rusiye arbiyleri Ukrayina regionlarına çeşit silâlarnen muntazam surette ücüm ete.
Rusiye yolbaşçılığı, Rusiye ordusı Ukrayinanıñ şeer ve köyleriniñ grajdan infrastrukturalarına, vatandaş ealisini öldürgenine ve hastahaneler, mektepler, bala bağçaları, energetika ve suv teminlevi obyektlerini yoq etkenine red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
