Rusiye ordusı Herson vilâyetiniñ Stanislav şeerinde tibbiy noqtanı ateşke tuttı, dep bildire Herson vilâyetiniñ arbiy memuriyeti.
''İşğalciler Stanislavda "acele yardım" noqtasını ateşke tuttılar. Mahsus maşina zarar kördi. Yahşı ki, adamlar zarar körmedi", - dep aytıla haberde.
Daa soñra vilâyet akimiyeti, Stanislavğa qarşı yapılğan artileriy ücümi aqqında bildirdi. Atışlar neticesinde 69 yaşında qadın yaralandı, onı hastahanege alıp kettiler.
Ukrayina Sağlıq nazirliginiñ soñki malümatına köre, yanvar ayına qadar Rusiye istilâsı sebebinden Ukrayinada 2022 senesi fevral ayından berli 1 501 tibbiy müessise zarar kördi, 195-i bütünleyyoq etildi. Nazirlikniñ malümatına köre, Rusiye ordusı 103 acele yardım maşinasına zarar ketirdi, 253 maşinanı yoq etti ve 125 maşinanı zapt etti.
Rusiye ordusı er kün Herson vilâyetiniñ işğalden azat etilgen qısmını, hususan vilâyet merkezini ateşke tuta. Delillerge baqmadan, Moskva Ukrayinanıñ bütün vatandaşlarına ücüm etkenini inkâr ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
