Sentâbrniñ 27-ne keçken gecesi Rusiye ordusı Ukrayinağa işğal etilgen Qırımdan İskander-M/KN-23 ballistik raketasınen, Qara deñizden Tu-22M3 bombardıman uçaqlarından eki X-22 qanatlı raketasınen, em de Şahed tipindeki 32 pilotsız uçaq ile ücüm etti, dep bildirdi Ukrayina Arbiy-ava quvetleri.
"Avağa qarşı küreş neticesinde 24 "Şahed" tipiniñ ücüm dronarı urıp tüşürildi. Bir uçaq Romaniyanıñ ava boşluğına kirdi, daa bir duşman dronı Ukrayina mudafaa quvetleriniñ telükesizlik hızmetiniñ areketleri neticesinde ğayıp oldı", — dep aytıla haberde.
Ukrayina Silâlı quvetlerinde, ava mudafaası Dnipropetrovsk, Mıkolayiv ve Odesa vilâyetlerinde çalıştı, dep qoştılar.
Daa evel Odesa vilâyetiniñ arbiy memuriyetinde bildirgenlerine köre, Rusiyeniñ ücümi neticesinde üç insan elâk oldı, daa 11-i, şu cümleden bir bala yaralandı.
RF reberligi, Rusiye ordusı Ukrayina şeerleri ve köyleriniñ grajdan infrastrukturalarına maqsatlı darbeler endirgenini, vatandaş ealisini öldürgenini ve hastahaneler, mektepler, bala bağçaları, energetika ve suv teminlevi obyektlerini yoq etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
