Noyabrniñ 25-ne keçken gece Rusiye ordusı "Şahed" tipi kamikadze pilotsız uçaqlarnı qullanaraq Ukrayinağa kütleviy ücüm kerçekleştirdi. Ukrayina Silâlı Quvetleriniñ Ava quvetleri Rusiye 75 dron qullanğanını ve olarndan 71 urıp tüşürilgenini iddia ete.
Ücümniñ esas yönelişleri Kıyiv ve Kıyiv vilâyeti edi. Ava telükesi signalı 6 saat devam etti. Kıyiv arbiy memuriyetiniñ yolbaşçısı Sergiy Popko paytaht üzerinde 60 "ava nişanı" urıp tüşürilgenini bildirdi. O geceki dron ücümini büyük cenk başlanğanından berli "eñ kütleviy" adlandırdı.
Ücüm neticesinde Kıyivde beş adam zarar körgen, olarnıñ arasında 11 yaşındaki bir bala, dep haber etti şeer başı Vitaliy Kliçko.
Şeerniñ Solomenkiy rayonında urıp tüşürilgen dron parçaları sebebinden bir qaç yanğın çıqqan: bala bağçasında ve adam yaşamağan bir binada.
Ücümden soñ Kıyivde 77 mesken bina ve 120 müessise elektrksiz qaldı, dep bildirdiler Ukrayina energetika nazirliginde.
Ukrayina devlet başı Volodımır Zelenskıy gece ücümini izaatlar eken onı Ukrayinanıñ noyabrniñ 25-nde Açlıq qurbanlarını añması ile alâqalandırdı.
"Açlıq soyqırımınıñ qurbanları añılğan kününiñ gecesinde 70-ten çoq "Şahed". Añlı terror eylemi. Bu vaqıt edi. Rusiye reberligi öldüre beleceginden ğurur duya", - dep bildirdi o.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
