Ukrayina Mudafaa naziri Oleksiy Reznikov, Rusiye ordusı alâ daa Hersondadır, keri çekilüv içün olarğa eñ azı bir afta vaqıt kerektir, dep bildirdi.
Reuters-ke bergen izaatında Reznikov bildirdi ki, RF-nıñ Herson vilâyetinde 40 biñ arbiyi bar, keri çekilüv ilân etilmesine baqmadan, şeerde, şeerniñ civarında ve Dnipro özeniniñ ğarp yalısında alâ daa quvetleri bar.
"Bu quvetlerni bir-eki künde Hersonda çıqarmaq o qadar qolay degil. Eñ azı bir afta vaqıt kerektir", - dedi o.
Aynı zamanda nazir, Rusiyeniñ areketlerini tahmin etmek qıyın ve Kıyivniñ öz planları olğanını qayd etti.
Reznikov, tahmin etti ki, Moskva aynı şekilde bir qaç ay içinde işğal etilgen qomşu Zaporijjâ viletindeki bölüklerini quvetleştire bile.
Noyabrniñ 9-nda Rusiyeniñ Ukrayinadaki işğalci quvetleriniñ komandanı general Sergey Suvorkin Rusiyeniñ mudafaa naziri Sergey Şoyguğa Herson vilâyetindeki ordunı Dnipronıñ sol yalısına çekmge teklif etti.
Herson Rusiye ordusı tarafından martnıñ başında işğal etildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
