Rusiye ofisiniñ OMON hadimleri Keriç boğazında talimler keçire. Bunıñ aqqında Rusiye gvardiyasınıñ matbuat hızmeti haber ete.
"Qırım Cumhuriyeti ve Aqyar şeerinde Rusiye gvardiyasınıñ baş ofisiniñ OMON hadimleri Rusiye Naqliyat nazirliginiñ egidası altında idarelerara talimler çerçivesinde vazifelerni yerine ketire", - dep yazıla bildirmede.
Bu malümatqa köre, OMON mahsus bölüginiñ müendislik tehnikiy gruppası talimler vaqtında naqliyatnı, şu cümleden Keriç köprübne demiryol keçitlerini köpekler tarafından baqtıra.
Rusiye gvardiyasınıñ malümatına köre, talimler noyabrniñ 12-nece devam etecek.
Qırımnıñ askeriyleştirilüvi
2014 senesi Qırım işğal etilgen soñ Rusiye yarımadada ve Qara deñizde muntazam sürette arbiy talimler keçire, arbiy tehnikanı, hususan uçaqquvar mudafaa sistemasını ketirip qoya.
2018 senesi yanvar ayında Fiolent burnunda S-400 Rusiye uçaqquvar-raketa kompleksleri arbiy nevbetçilikke başladı. Sentâbr ayında bunıñ kibi kompleksler Kezlevde de yerleştirildi. 2018 senesi noyabrniñ soñunda ise Canköyde S-400 uçaqquvar-raketa kompleksiniñ dörtünci divizionı arbiy nevbetçilikke başladı.
Ukraina Baş ştabı, Rusiye arbiyleriniñ Qırımda yapqanlarını qanunsız dep adlandıra.
Ukrainanıñ BM daimiy vekiliniñ muavini Yuriy Vitrenko, Rusiye yarımadada nükleer silâsını yerleştirgeninden qorqqanını bildirdi. Ukraina Milliy telükesizlik ve mudafaa şurasınıñ kâtip muavini Serğiy Krıvonis, Qırımda nükleer silâsı olması mümkün bir qaç yer bar, dep bildirdi. Onıñ fikirince, onıñ yarımadada yerleştirilüv ihtimali «ğayet büyüktir».
2020 senesi dekabr ayında Kreml temsilcisi Dmitriy Peskov Rusiyeniñ Qırımda «telükesizligi içün er şey yapmağa aqqı bar», dep bildirgen edi.
BM Baş Assambleyası 2019 senesi dekabr ayında Rusiyeni işğal etilgen Qırımdan ordusını çıqarmasına ve Ukraina topraqlarınıñ vaqtınca işğalini toqtatmasına çağırğan qararnı qabul etti.
