Rusiye insan aqları vekâletlisi Tatyana Moskalkova martnıñ 20-nde Kyivge «RİA Novosti-Ukraina» baş muarriri Kirill Vışinskiyniñ mahkemesine keldi.
«Kirill Vışinskiyniñ aqlarına nasıl riayet etilgenini, alını ve imkân olğanı qadar oña bütün rusiyeliler tarafından qoltutulğanını körmek içün mahkemege keldim», – dep bildire Moskalkovanıñ aytqanlarını Rusiye ombudsmeniniñ resmiy saytı.
Ukraina Yuqarı mahkemesi martnıñ 20-nde Vışinskiyniñ imayesi «qanunsız tutulğanına» dair temyiz şikâyetini baqmaqta. Bundan evel mahkeme jurnalistniñ oturışuvda şahsen iştirak etmek muracaatını qanaatlendirdi.
Vışinskiy 2018 senesi mayısnıñ 15-nde Kyivde tutulğan edi. O, devlet hainligi ve Ukrainağa qarşı informatsion faaliyetten şübheli sayıla.
Ukraina telükesizlik hızmetiniñ malümatına köre, Vışinskiy Moskvadan vazife alıp, Rusiyeniñ ukrain yarımadası ilhaqını aqlamaq içün Qırımda, soñra Kyivde «DNR» ve «LNR» gruppalaşmalarına qoltutmaq içün malümat azırlay edi. Er ay, tahqiqatçınıñ malümatına köre, bu faaliyetke 53 biñ euro ala edi. SBU bildirgenine köre, bu para Rusiyeden Sırbistan üzerinden kele edi.
Vışinskiy bütün qabaatlarını inkâr ete. Tutulğanından berli o, SİZOda buluna.
2018 senesi iyülniñ 2-nde Ukraina Yuqarı Radası spikeriniñ birinci muavini İrına Geraşçenko Ukraina Vışinskiyni deñiştirilecekler cedveline kirsetilüvini baqmağa azır, dep bildirgen edi.
