Rusiyede silâ satın ala bilecek insannıñ yaşı 25-ten az olmamalı, dep bildirdi salı künü Keriç kollecini ziyaret etken Rusiye insan aqları vekâletlisi Tatyana Moskalkova jurnalistlerge.
«Silâ satın alma aqqı içün yaş arttırılmalı, insan eñ az 25 yaşında olmaq kerek, bu mesele baqılmalı», – dep yaza Moskalkovanıñ aytqanlarını TASS.
Federatsiya Şurasınıñ mudafaa ve telükesizlik komitetiniñ azası Olga Kovitidi Qırım senatorı olaraq Keriçteki faciadan sebep vatandaş silâsı içün 21 yaş seviyesini belgilemege teklif etti.
Al-azırda Rusiye qanunlarına köre, tegiz namlu silâsını 18 yaşını toldurğan gençler satın ala bile, tüfek satın almaq içün 21 yaşında olmaq kerek.
Patlav ve atışuv çarşenbe künü, oktâbrniñ 17-nde, Keriç politehnik kollecinde oldı. Rusiye Tahqiqat komitetiniñ malümatına köre, Keriç politehnik kollecinde olğan patlavnı 4-ünci kurs studenti, 18 yaşında Vladislav Roslâkov kerçekleştirdi. O, «özüni öldürdi». Facia neticesinde 21 insan elâk oldı. Qırımda üç künlik matem ilân etilgen edi.
Rusiye ve ilhaq etken Qırım hastahanelerinde Keriçteki ücümde yaralanğan 46 insan buluna, üçü ağır alda. Qırım hastahanelerinde Keriçte yaralanğan 14 genç ve 11 büyük qala. Olarnıñ alı orta ağır dep sayıla.
Oktâbrniñ 19-nda Keriçte ve Yedi Quyu rayonında ücüm qurbanlarınıñ cenazeleri qılındı. Vedalaşuv merasimine biñlernen insan keldi.
Qırım Muhtar Cumhuriyetiniñ prokuraturası Keriç politehnik kollecinde olğan patlavnı terror ücümi olaraq tasnif ete.
