Rusiye ombudsmanınıñ qabul odasında Tatyana Moskalkovanıñ "Hizb ut-Tahrir" teşkilâtına alâqası bar olğanında şübheli sayılıp apiske alınğan qırımlı Esma Nimetulayeva, Nasiba Saidova, Elviza Aliyeva ve Fevziye Osmanovanıñ azat etilmesi aqqında muracaatını qabul ettiler. Bu muracaat altı buçuq biñ imza topladı, dep bildire "Qırım birdemligi" cemaat birleşmesi.
Mütenasip muracaatnı adliyeci Nazim Şeyhmambetov, Nasiba Saidovanıñ aqayı ve ana-babası, Fevziye Osmanova ve Elviza Aliyevanıñ anaları bergenler, muracaat altı buçuq biñ imza toplağan. Eyyet iştirakçileri "Qırım birdemligi"ne bildirgenine köre, muracaat qayd etilgen.
"Polis ve mahsus hızmetlerniñ hadimleri tarafından büyük manialar ile, biz, eyyetniñ tolu terkibinde olmasa da, Qırımdan kelgen muracaatnıñ adresatlarına yettik. Biz balalarımıznıñ serbestligi içün küreşmege devam etecekmiz. İmza qoyğan ve qızlarımız içün qasevetlengen er keske minnetdarım", — dep izaatladı Dinara İyupova, Nasiba Saidovanıñ anası.
Vesiqada Nasiba Saidovanıñ babası Sadıq Urinbayev, orta küz ayınıñ 15-nde silâlı insanlar dört qorantanıñ evinde tintüv keçirdi, dep bildire. Bundan soñ 39 yaşındaki Esma Nimetulayeva, 18 yaşındaki Nasiba Saidova, 20 yaşındaki Elviza Aliyeva ve 21 yaşındaki Fevziya Osmanova yaqalandı.
"Soñra belli oldı ki, olarnıñ episi terroristik faaliyetke ve akimiyetni zapt etmek ıntıluvına alâqası olğanında qabaatlana. Biz bu qabaatlavlarnı bütünley red etemiz... Bu qadınlar namuslı ve dindar olğanları belli. Olarnıñ zorbalıqqa, şu cümleden terrorizmge iç bir alâqası yoq", — dep aytıla Urinbayevniñ muracaatında.
İmza qoyğanlarnıñ episi taqipniñ toqtatıluvı ve tutulğan qırımtatar qadınlarınıñ deral azat etilmesi içün tedbirlerniñ alınmasını talap ete.
Delegatsiya erkânında 16 insan bar, olarnıñ arasında daa evel apiske alınğan qırımlılarnıñ ana-babaları, adliyeci Nazim Şeyhmambetov, qırımtatar halqınıñ faalleri ve aqsaqalları bar.
Orta küz ayınıñ 15-nde Rusiye quvetçileri Qırımda dört qırımtatar qadınını tutıp, olarnı Rusiye Ceza kodeksiniñ 205.5 maddesine istinaden (terror teşkilâtınıñ faaliyetinde iştirak etüv) "Hizb ut-Tahrir" davası boyunca qabaatladı.
Tutulğanlar arasında Esma Nimetulayeva, beş balanıñ anası ve siyasiy mabüsniñ apayı; Nasiba Saidova, bala bağçasında çalışqan student; Elviza Aliyeva ve Fevziye Osmanova.
Orta küz ayınıñ 16-nda Aqmescitteki Rusiye kontrolindeki Kiyev rayon mahkemesi dört kişini eki ayğa SİZO-ğa yolladı.
