Rusiye iqtisadiy inkişaf nazirligi Ukrainanı Rusiyege ketirilgen zarar miqdarına köre «üç memleket» sırasına kirsetti.
«Tış bazarlarda manialarnı yoq etüv işi» adlı prezentatsiyasına binaen, Ukraina tarafından Rusiyege ketirilgen zarar 775 mln dollarğa yete. Ekinci yerde ABD (1,17 milliard dollar), birinci yerde – Avropa birligi (2,42 milliard dollar), dep bildire Azatlıq Radiosı.
Rusiye iqtisadiy inkişaf nazirligi qayd ete ki, Ukraina Rusiyege qarşı kirsetken sıñırlav tedbirleriniñ sayısına köre «ekinci» yerde buluna. Nazirlik böyle tedbirlerniñ sayısı 22 ola, dep esapladı.
Daa evel Rusiye ihrac eticileri Ğarpnıñ iqtisadiy sanktsiyaları sebebinden 6 milliard 300 million dollarnı coydı, dep bildirilgen edi. Bu aqta Rusiye iqtisadiy inkişaf nazirliginiñ maruzasında aytıla. Kösterilgen raqamlar – nazirlikniñ ihrac eticileri 2018 senesiniñ soñunda bergen malümattır.
Malüm ki, ABD ve Avropa Birligi Rusiyege qarşı yañı sanktsiyalar azırlay. Bu sefer olap Qırım yalısında ukrain gemileri ve askerlerniñ zapt etilüvinen bağlı.
Reuters keçirgen iqtisadiy ve maliye talilcileriniñ sorav neticelerine köre, 2019 senesi Rusiyede yañı ğarbiy sanktsiyalar, para zayıflaması ve bergi artqanı sebebinden iqtisadiy yavaşlatuv ve inflâtsiya artacaq. 2019 senesiniñ soñuna doğru inflâtsiya 5%-ğa tezleşecek.
