Rusiye kütleviy haber vastaları Rusiye Mudafaa nazirliginiñ malümatına esaslanıp, avgustnıñ 4-nde saba Krasnodar ülkesinde, Novorossiysk rayonında, «Rusiye gemileri eki ukrayın ekipajsız katerniñ arbiy-deñiz bazasına qarşı yapqan ücümini keri qaytardı», dep bildirdi.
Rusiyeniñ acele hızmetleri Novorossiysk civarında patlavlar aqqında bildirdi. Al-azırda limanda gemi areketi vaqtınca yasaqlandı, dep bildire Rusiye devlet kütleviy haber vastaları.
Berilgen malümatqa köre, ücüm neticesinde zararlar ve yaralanğanlar yoq. Bu malümatnı mustaqil menbalarda tasdıqlamaq imkânsız ola.
Rusiye akimiyeti kene Ukrayınanı qabaatlay. Kyiv bir izaat bermedi.
Novorossiyskte Rusiye cenübiniñ eñ büyük ticaret limanı ve Rusiye Qara deñiz flotunıñ bazası yerleşe.
Rusiye akimiyeti avgustnıñ 4-ne keçer gecesi Qırımğa 13 uçucısız ücüm etti, dep bildirdi. 10-u tüşürildi, daa üç dron «radioelektron küreş vastalarınen bastırıldı».
CNN telekanalı darbe deñiz pilotsız cihazları sınap baqılğan Ukrayına Arbiy-deñiz quvetleriniñ gizli bazası aqqında levha kösterdi.
Ukrayına telükesizlik hızmetindeki CNN menbalarınıñ malümatına köre, deñiz pilotsızları Qırımğa qarşı ücümlerde eñ az eki kere qullanılğan edi: 2022 senesi oktâbr ayında Aqyarda Qara deñiz flotuna ve 2023 senesi iyül ayında Keriç (Qırım) köprüne darbe endirgende.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
