Rusiyeniñ Novorossiysk, Gelencik ve Krımsk şeerleriniñ 160 biñden çoq sakini magistral suv ağında olğan qaza neticesinde suvsız qaldı. Plavni hutorı rayonında boru patladı, dep bildire Azatlıq Radiosı.
Haber etilgenine köre, ğayrıdan tiklev işleriniñ keçirilmesi içün bir künden çoq kerek ola bile, qaza aqibetlerini yoq etmek içün qomşu Apanadan tehnika celp etildi.
Novorossiysk ve Krımsk şeerlerinde aman-aman bütün mesken evler ve içtimaiy obyektler suvsız qaldı. Sakinlerniñ evlerine suv avtotsisternalarnen ketirile. Krımsk akimiyeti, bazarertesi künü şeerde bala bağçaları çalışmaycaq, mekteplerniñ işi ise qısqartılacaq, dep ilân etti.
Gelencikte aman-aman altı buçuq biñ mesken ev ve 48 içtimaiy obyekt suvsız qaldı.
