Rusiye FSBsiniñ teşebbüsinen qırımtatarlarnıñ milliy lideri Mustafa Cemilevge qarşı Qırımda açılğan davada qabaatlav tarafı Qırım.Aqiqatnıñ maqalelerini qullana. Advokat Nikolay Polozovnıñ bildirgenine köre, dava 11 cılttan ibaret, onıñ malümatında Qırım.Aqiqatnıñ eñ az eki haberi mevcut. Bu malümatnıñ bir qısmı da muarririyette bar.
«Qırım.Aqiqat mühbirleriniñ işğal etilgen Qırımda serbest çalışıp olamağanına baqmadan, Rusiye tahqiqatçıları jurnalistlerniñ maqalelerini serbest qullana. Meselâ, Mustafa Cemilevniñ 2014 senesi mayısnıñ 3-nde yarımadağa, olarnıñ fikirince, yarıp keçkenini isbatlamaq içün maqalelerden birini qullandılar. Cemilevniñ oña qarşı başlatılğan cinaiy esnas aqqında bilgenini isbatlamaq içün daa bir haber qullanılğan edi», – dep bildirdi Polozov.
Daa evel Nikolay Polozovnıñ bildirgenine köre, «Mustafa Cemilevniñ davası» yarımada şimalinde Rusiye kontrolindeki Ermeni Bazar şeer mahkemesinde baqılacaq.
Qırımdaki Rusiye Tahqiqat komitetiniñ idaresi aprelniñ 13-nde qırımtatar halqınıñ lideri Mustafa Cemilevni Rusiye Ceza kodeksiniñ üç maddesine köre qabaatladı. Advokat Nikolay Polozovnıñ aytqanına köre, şimdi Cemilevge qarşı oğlu Hayserniñ ukrain davası qullanıla.
Qırımda mayısnıñ 27-nde Rusiye Tahqiqat komiteti qırımtatar halqınıñ lideri Mustafa Cemilevge qarşı «cinaiy dava» tahqiqatını yekünledi.
İyünniñ 8-nde berilgen malümatqa köre, Rusiye Tahqiqat komiteti Cemilevniñ davasını mahkemege berdi. Bundan soñ Cemilevniñ advokatı Nikolay Polozov ne oña, ne de müvekkiline haber etilmedi, dep bildirdi.
Cemilevniñ fikirince, işğal etilgen Qırımda Rusiye FSBsi tarafından oña qarşı açılğan dava qırımtatarlarnı yarımadadan çıqarmaq içün qullanıla.
Ukraina prezidentiniñ Qırım Muhtar Cumhuriyetindeki temsilciligi Rusiye tahqiqatçılarınıñ qırımtatarlarnıñ milliy lideri Mustafa Cemilevge qarşı cinaiy davasını siyasiy taqip dep saya.
